LDD ka pritur më shumë nga koalicioni qeverisës

Kryetari i Lidhjes Demokratike të Dardanisë, Nexhat Daci ka deklaruar të premten se kjo parti ka pritur më shumë nga koalicioni qeverisës, nga Presidenca dhe Qeveria e Kosovës. Gjatë një takimi që ka zhvilluar me ambasadorin e OSBE-së në Kosovës, Werner Almhofer, Daci ka thënë se, “populli i Kosovës nuk është i kënaqur me këto rezultate”.
“Një vend ku ushtria proteston, policia kërcënon me protesta të vazhdueshme, ku shëndetësia nuk është në nivelin e duhur dhe kërcënon vazhdimisht me protesta, ku arsimi po ashtu ka protesta të vazhdueshme. Atëherë ne pyesim, ku janë rezultatet?”, ka thënë kreu i LDD-së.

Një gjendje e tillë – vijoi ai - na bind që, Kosova ka nevojë për zgjedhje, në mënyrë që alternativa e duhur për zgjidhjen e problemeve të qytetarit të Kosovës, të jetë në plan të parë. “Kjo që po e shohim nuk është alternativa e duhur, dhe nuk po premton gjumë të rehatshëm për popullin e Kosovës’, ka thënë Daci.

Daci po ashtu kërkoi nga OSBE-ja që të mundësoi që, zgjedhjet e ardhshme të monitorohen nëpërmjet kamerave, të cilat do të bindnin çdokënd, se proceset zgjedhore janë demokratike dhe fer.